Maðurinn á Álftanesi hefði betur skrifað undir fjölmiðlalögin

Mönnum ætti að vera það ljóst núna hvaða skaði hlaust af því að forsetinn gerði á sig hér um árið þegar hann synjaði fjölmiðlalögunum staðfestingar. Sá gjörningur var með ólíkindum. Þetta er sami forsetinn og hossaðist seinna um heiminn í einkaþotu Jóns Ásgeirs Jóhannessonar og fannst það bara heppilegt að það skildi falla ferð.

Fólk sá ekkert að því að fjölmiðlarnir sem átti að koma í eðlilegra horf mtt. eignarhalds risu upp og ólmuðust. Sú ótrúlega afbökun á fjölmiðlalögunum sem sumir fjölmiðlanna leyfðu sér að bera á borð fyrir sína hlustendur og lesendur var skammarleg. Það versta við framganginn var að fyrir honum stóð eini beini hagsmunaaðili málsins. Sá hluti almennings í landinu sem sá gildi þessarar lagasetningar fékk einfaldlega ekki að komast að í fjölmiðlunum sem lögin áttu að setja eignarhaldsskorður.

Sem dæmi um afleiðingar af furðulegu fyrirkomulagi eignarhalds fjölmiðlanna á Íslandi er stórskrítin uppákoma á Stöð 2.

Í gærkvöldi tók fréttastofa talsverðan tíma í að kynda undir það lýðskrum og þá múgsefjun sem er verið er að magna upp í þjóðfélaginu. Í stað þess að leggja sitt lóð á vogarskálarnar við að róa þjóðina og styrkja tók Stöð 2 til við að espa. Það sem ég á við er pistillinn sem fluttur var í fréttatímanum í gærkvöldi og hófst á því að rifjað var upp þegar fréttamaður Stöðvar 2 fullyrti að orðstír Íslands hefði "beðið ómælanlegan hnekki" á erlendum vettvangi. Í framhaldi af því var sýnt þegar forsætisráðherra spurði fréttamanninn hvort hann hefði einhverjar sannanir fyrir þessari fullyrðingu. Það sem á eftir fylgdi var með ólíkindum. Fréttastofan leifði sér að birta lista af ótrúlegum fullyrðingum og dylgjum sínu máli til stuðnings. Sá málflutningur sem þarna var settur fram er öllum fjölmiðlamönnum til skammar og á eingöngu heima í DV eða einhverju viðlíka sorpriti. Þetta átti ekkert skylt við fréttir.

Hér á eftir fylgir upptalning fréttastofunnar: (Mín svör í sviga)

Lánalínur til landsins stöðvaðar (Þetta hafði þegar gerst áður en Davíð tjáði sig í Kastljóst sökum lánsfjárþurrðar alls staðar)
Viðskiptabankarnir farnir í þrot (þetta gerðist fyrst og fremst sem afleiðing gerða Breta)
Krónan hrundi (Sama og nr. 2)
Erlend blöð kalla stjórnvöld aula (Hvaða blöð? Hvað er nýtt við upphrópanir í fjölmiðlum? Einhver skaði?)
Íslensk fyrirtæki fá ekki fyrirgreiðslur (Sama og nr. 2 Ekkert sagt um hvaða fyrirgreiðslu er átt við)
Erlendir bankar hættir að versla með krónuna (Sama og nr.2)
Námsmenn geta ekki tekið út námslánin sín (Sama og nr.2 en er bundið við þau lán sem fara á einhvern máta í gegnum breska banka)
Íslendingum hent út úr verslunum í Danmörku (Eitt tilvik, einn Íslendingur, og við vitum ekkert um af hverju það gerðist)
Íslenskir húseigendur á Spáni verða fyrir aðkasti Breta (Já, Breta! Takk fyrir Mr. Brown. Við því mátti búast. Sjá nr.2)
Íslendingum hent út úr leigubílum í Bretlandi (Sama og síðasti liður)

Í lok þessarar upptalningar endurtekur "fréttastofan" svo spurningu forsætisráðherra um hvort fréttamaðurinn hafi eitthvað fyrir sér í sínum fullyrðingum um "ómælanlegan hnekki".

Þetta er ekki fréttamennska. Hér er á ferðinni drepsár starfsmaður Baugs í beinni, ósmekklegri árás á forsætisráðherra sem stendur í ströngu þessa dagana við að reyna að gera við þær skemmdir sem orðnar eru. Þetta er ekki fréttamennska heldur múgæsing.

Hver segir að skaðinn sé eitthvað ómælanlegur (sem ég held að sé verið að nota í merkingunni varanlegur eða langtíma)? Ég held að þvert á móti sé þessi skaði skammtímaskaði sem mun fyrst og fremst bitna á okkur landsmönnum rétt á meðan ástandið vindur stórlega upp á sig erlendis. Þegar það gerist munu atburðirnir sem komu okkur í núverandi stöðu fljótt gleymast erlendis og þá sérstaklega þegar eignum Landsbankans er komið í verð og skuldir til eigenda Icesave verða greiddar. Með þessu er ég ekki að segja kvalir þeirra landsmanna sem þetta bitnar hvað verst á eitthvað minni. Ég er eingöngu að beina sjónum mínum að þessum málflutningi Stöðvar 2 hvað varðar orðstí landsins.

Jón Ásgeir var rétt orðinn allsráðandi í fjölmiðlum á Íslandi fyrir örfáum dögum. Ég er ekki klár á hvernig það stendur en held að það mál sé ekki til lykta leitt og held reyndar að möguleikinn sé enn til staðar. Þessi gjörningur er mögulegur vegna þess að maðurinn á Álftanesinu neitaði að staðfesta lög sem áttu að koma í veg fyrir að þessi staða gæti komið upp. Núna fyrst er að renna upp fyrir fólki alvarleiki þessara mistaka.

Ekki held ég nú að fjölmiðlar hefðu getað stöðvað þá þróun sem leiddi til núverandi ástands. Ég held ekki að fjölmiðlafólk sem hópur sé endilega það vel gefið að það gæti hafa séð þróun mála fyrir eða tekið á henni á einhvern þann máta sem hefði dugað til. Það eru ekki allir fjölmiðlamenn í sama klassa og Agnes Bragadóttir, því miður. Fjölmiðlar sem eru í þeirri aðstöðu að geta illa fjallað á trúverðugan máta um þau öfl sem stýra þjóðfélaginu eru gagnslausir. Fjölmiðlar sem geta ekki tekið fyrir fjármálastofnanir landsins og gagnrýnt vegna þess að þeir eru í eigu þessara stofnana eru ónýtir sem hagsmunagæsluaðilar þjóðarinnar. Þetta hlýtur hvert mannsbarn að sjá.

Aldrei nokkurn tíma hefði Stöð 2 leift sér að birta viðlíka árás á Jón Ásgeir þó hugsanlega hefði oft verið ástæða til. Morgunblaðið hefði aldrei getað birt sannferðuga krítík á Björgólf Guðmundsson. Þessum málum verður einfaldlega að koma í lag. Fyrr geta fjölmiðlar einfaldlega ekki gegnt hlutverki sínu á trúverðugan hátt.

Fjölmiðlar í heljargreipum

Get ekki orða bundist. Hvað kallast það ef það er í bundnu máli

Mér datt í huga að fara hratt yfir atburðarásina, svona eins og Shakespeare á 90 mínútum. Ég læt lesanda eftir að ráða í tilvísanir í atburði.

Ég er ekki skáld að mennt og því flæða þessi bragfræðiafbrot með óafvitað og það verður bara svo að vera.

Bönkunum hugðust þau bjarga

en báru ekki víur í marga.

Bara að þau gætu nú við þetta hætt.

Þau rústuðu öllu sem ríkið

rak þá og ýttu í síkið

með öllu sem þau gátu við þetta bætt.

 

Illt er þá aðra að saka

sem eingöngu krókinn sinn maka

á kostum sem þeim var sannlega rétt.

Fingrum við otum að öðrum

sem endemis bölvuðum nöðrum.

En flest hefðum  gert það sama svo létt.

 

Þau hlupu upp til handa og fóta

helför að Glitni að móta,

ríkisvæðingar næturnar myrkar.

Skýr voru merkin sem skinu

og skelfing að þau ekki hrinu.

Baksýnisspegillinn virkar

 

Friedlander-Singer er farinn,

frosinn  því Landsbanki er marinn.

Okkar stórvinir Bretar sér endurkjör tryggja.

Þeir kompaní versla og koma í umferð

en kosta með lánum með veði í velferð.

Er ekki  lán hægt á láni að byggja?

 

Er Seðlabanki vor sjálfur

sérlega æðst setti álfur

allsendis trausti og skilningi rúinn?

Er rétt þessar raunir að festa

við ráðamenn staka og bresta

í lýðskrumsins kór „þú ert búinn“?

 

Nú hring eftir hring eltum skottið

með alþjóðlegt háðið og spottið.

Svíar bíða nú láns, sem sjálft bíður Svía.

Milljarða þurfum svo marga af haugi

má þá ei sækja í hirslur hjá Baugi?

Væntingar eru svo hátt ofar skýja.

 

Þau gjörningaveður sem geysa

eru vandi sem gott er að leysa

Því aðeins að þjóðin sig hemji á fundum.

Það bjargar engu að baula

og blístra með vitgrönnum aula.

Framferði Harðar er skammarlegt stundum.

 

Við rísum úr stónni öll sterkari

og sjálf verður þjóðin af merkari.

Við sýnum að við getum gert það sem þarf.

Nú mest þarfa að þjappa

þétt saman og stappa

stálinu í þjóð sem fékk þrautseigju í arf.

Bjarna burt!

Til þeirra sem málið varðar.
Ég minni á að Bjarni Harðarson situr í Þingvallanefnd.
Það má ekki gleymast að víkja honum þaðan hið snarasta.
Þeir sem til þekkja vita að hans vinnubrögð þar hafa gefið tilefni til þess. Þegar við bætist hvernig hann flettir ofan af sínum innra manni á þennan máta má það ekki hjá líða að losna við hans klístraða fingrafar alls staðar sem því verður við komið.

Guðni: Bjarni axlar ábyrgð

Misskilinn leiðtogi

Hörður Torfason æsir til uppþota og skilur svo ekkert í því að fólkið sem hann safnaði á Austurvöll kastar eggjum og tómötum og hegðar sér eins og versti skríll. Maðurinn er hissa!Virkja reiðina segir hann. Hvað heldur Hörður Torfason að komi út úr því að æsa fólk sem hefur lent í alvarlegum fjárhagslegum hremmingum af margvíslegum toga. Heldur hann að sárreitt fólk safnist saman á Austurvelli til að styrkja og hugga hvert annað? Heldur Hörður að fólkið komi saman á Austurvelli til að leita blárra blóma? Heldur hann að það að espa fólk upp og safna örvingluðu fólki hundruðum eða þúsundum saman á einum stað geri eitthvað til að bæta ástandið á einhvern hátt?Hvaða hugsanlegt gagn gæti verið af því að gera landið stjórnlaust vegna kosninga í miðri þessari orrahríð? Svona lítur málið út. Ef við gefum okkur það að núverandi stjórnvöld (ríkisstjórn og alþingi) séu að vinna að því af heilindum að finna lausn á aðsteðjandi vanda, heldur einhver að það hjálpi til standa við útidyrnar og berja uppá til þess að reyna að víkja réttkjörnum fulltrúum frá. Getur það gert nokkuð annað en að grafa enn fremur undan trúverðugleika okkar samningamanna við þeirra störf. Settu þig í þau spor að þú sitjir öðrum megin við borðið, með gargandi skríl bakvið þig sem heimtar að þú víkir, og reynir að semja við Icesave-brenndan Breta hinu megin borðsins. Er sá líklegur til að hafa samúð með þínum sjónarmiðum og vilja koma til móts við þig? Bretinn veit sem er að tíminn er dýrmætur og þú hefur ekki efni á að tefja og reyna að semja þig út úr vandanum. Við þessar kringumstæður er Hörður Torfason að valda landi og þjóð miklu tjóni. Ég held að gargandi villimennirnir á Austuvelli ættu frekar að beina sínu eggjakasti að Herði og gefa yfirvöldum svigrúm til að ná landi áður en krafan um koningar er reifuð frekar.Við höfum ekki tíma til að fá nýtt fólk sem stendur. Við skulum sjá hvað setur þega um hægist og fólk fer að róast og sjá hlutina í réttu ljósi. Þegar meiri upplýsingar liggja fyrir getum við betur metið hvað er rétt og hvað er rangt. Hver sagði satt, hver laug og hvern skal draga fyrir dóm. Það verða einhverjir látnir svara til saka.Undanfarna daga hafa æstar upphrópanir byggðar á litlum eða engum heimildum tröllriðið öllum fjölmiðlum. Slíkt gerir ekki nokkurn hlut annan en að auka á vanlíðan þeirra sem nú þegar hafa orðið fyrir barðinu á hörmungum undanfarinna vikna. Davíð og restin af Seðlabankastjórninni mun víkja þó ekki væri nema bara vegna þess að þessir menn eru rúnir trausti, með réttu eða röngu. Fleiri hausar munu fjúka, sumir réttilega, aðrir að ósekju til að slökkva blóðþorstann. Það er bara rangt að grafa sér dýpri holu við núverandi aðstæður.Ég hef ekki minnstu samúð með nokkrum af okkar ráðamönnum sem viljandi hafa kallað þetta yfir okkur. við munum komast að kjarna málsins og þá er mál að láta verkin tala. Þegar við vitum hvað er hverjum að kenna.

Þau voru súr

Ég hef lýst þeirri skoðun minni að borgarstjórnarflokkur Sjálfstæðisflokksins hefði átt að halda að sér höndum og koma sér í var. Það mun því miður koma berlega í ljós að ég hef rétt fyrir mér. Það mun gerast á þá leið að þessi sorglega atburðarás er svo einföld á yfirborðinu að almenningur mun eiga mjög auðvelt að muna hana alla. Þegar svo líður á kjörtímabilið og borgarstjórn þarf að taka á málum á miður vinsælan máta mun minnihlutinn halda valdasetuklúðrinu hátt á lofti og meirihlutinn mun þurfa að eyða tíma sínum öllum í að sannfæra almúgann allan um að á stjórnarheimilinu sé allt í himna lagi. Nixon sagði „Let them deny it" Öll orkan fer í það og þegar að kosningum kemur verða það fleiri en ég og fleiri en bara Reykvíkingar sem hafa glatað trúnni. Þetta fer á versta veg, því miður.

 Illa sat hann í stólnum en verr stendur hann upp úr honum. Víkjandi Borgarstjóri kjökrar og brigslar mönnum um svik og pretti. Honum hefði verið hollast að lýsa yfir vonbrigðum með þessi endalok og láta þar við sitja. Líða hljóðlega inn í sólarlag síns pólitíska ferils og hverfa í gleymsku þegjandi með þeirri reisn sem í því felst að taka hlutunum eins og maður.

Borgarstjóri mætir í Ráðhúsið

Mér er ómótt. Hvern get ég kosið næst.

Á einhver skrítinn hátt er búið að svipta mig kosningarétti í næstu borgarstjórnarkosningum. 

Ef Sjálfstæðismenn mynda aftur borgarstjórnarmeirihluta með Framsóknarmönnum lofa ég því að mitt atkvæði í næstu borgarstjórnarkosningum fer ekki til D lista.

Ég mun þurfa að brosa vandræðalega og skammast mín út þetta kjörtímabil og fórna höndum í uppgjöf. Ég er reyndar alsæll að Ólafur F. Magnússon er ekki borgarstjóri lengur en mig setur hljóðan við það að borgarstjórnarflokkur Sjálfstæðismanna skuli vera svona skyni skroppinn að sjá ekki að þetta er þeirra versti leikur í stöðunni.

Þið eruð orðin aðhlátursefni. Meira nú en þegar þið voruð í helgreipum ÓFM. Sá óvinafagnaður sem þið hafið stofnað til mun skaða ykkur, og mig, illa í framhaldinu.

Nýr meirihluti að fæðast

Nei! Hætta strax!

Það komst hreyfing á málin. Núverandi meirihluti að bresta og er það vel.

Þau mega eiga það sem þau hafa vel gert. Að mínu mati er borgin fallegri og hreinni núna en nokkurn tíma áður og margir aðrir hlutir á beinni uppleið og það eigna ég átaki starfandi meirihluta, í það minnsta að hluta. Það er bara ekki það sem er að. Þó mikið sé gefandi fyrir að hafa töglin og hagldirnar til að geta komið sínum hugðarefnum í framkvæmd er þó meira um vert að haga hlutunum þannig að maður tryggi sér stjórnaraðkomu til framtíðar. Þetta er borgarfulltrúunum að sjálfsögðu ljóst og því fer ónotalega um mig þegar fjölmiðlar upplýsa um þreifingar í þá veru að draga Framsókn inn í meirihlutann. Það væri grátbrosleg niðurstaða ef upphaflegur meirihluti Sjálfstæðismanna og Framsóknar væri endurvakinn. Það að bjóða þeim að borðinu núna og bæta þeim við hefði einn kost. Það drægi tennurnar úr ÓFM en þeim tönnum væri samstundis komið fyrir í skoltum Framsóknarmanna sem dæmin sýna að myndu ekki víla það fyrir sér að bryðja. Það væri beinlínis skylda þeirra að nýta svo gullvægt tækifæri til að láta til sín taka. Þessi niðurstaða væri líklega meira sorgleg en brosleg því það er löngu komið nóg af því að Sjálfstæðismenn útvegi Framsóknarflokknum völd langt umfram kjörfylgi.

Til borgarstjórnarflokks Sjálfstæðismanna beini ég þú enn og aftur þeim eindregnu tilmælum að hætta og það strax. Hristið af ykkur allan grun um að þið hyggist grafa neglurnar í þá hrjúfu jörð sem þrákelni og valdasýki er og láta skrapa þær upp að kviku þegar áframhaldandi þátttaka í brothættu meirihlutasamstarfi dregur ykkur dýpra í svað ráðaleysis.

Hætta strax!

Samstarfið á „endastað"

Ekki grafa dýpri holu

Hér er einföld ábending til borgarstjórnarflokks sjálfstæðismanna. Hættið strax og dragið ykkur út úr þessari endaleysu.

Þið genguð til þessa samstarfs eftir að hafa unnið með Ólafi F. Magnússyni í borgarstjórn um langt skeið. Ykkur var dagljóst frá upphafi að maðurinn er ósamstarfshæfur. Því ætti ykkur að vera jafn ljóst að það að grafa ykkur dýpri holu til að sökkva í gerir ekkert annað en að minnka möguleika ykkar til að komast aftur til áhrifa í borgarmálum um langa framtíð. Látið af þessu og leifið honum að grafa sér gröf. Ég er mest hræddur um að það sé nú þegar um seinan fyrir ykkur en það er kannski ekki of seint fyrir mig sem borgara.

 Einu lofa ég ykkur. Ef þið hættið ekki þessu samstarfi hið snarasta munuð þið ekki fá mitt atkvæði í næstu kosningum. Það er nú þegar orðið tvísýnt.

Vilja breytingar á meirihlutasamstarfinu

Skaðinn er skeður þó enn megi laga stöðuna

Kæri borgarstjórnarmeirihluti.

Það virðist vera lýðum ljóst að ykkar tími er liðinn. Hann kom reyndar aldrei almennilega en nú er mál að þið rísið upp við dogg, nuddið stírurnar úr augunum og sjáið raunveruleikann eins og hann er. Ef þið slítið ekki þessu ólánlega samstarfi er dagljóst að meirihluta þátttöku Sjálfstæðisflokksins í borgarstjón er lokið um all-nokkurt skeið.

Ég fullyrði að enginn borgarstjórnarflokkur hefur gert önnur eins reginmistök og þessi annars góði hópur sem situr fyrir hönd Sjálfstæðismanna í borgarstjórn. Þetta samstarf er ekki byggt á sandi. Verra. Þetta samstarf er byggt á Ólafi F. Magnússyni. Það er nú undirstaða í lagi.

Í öllum bænum gangið út úr þessu samstarfi hið snarasta til að bjarga því sem bjargað verður.

 

Í guðs bænum slítið þessu samstarfi

Sorglega röð meirihlutamyndana í borgarstjórn Reykjavíkur þetta kjörtímabil þekkja allir og því ekki þörf að rekja þá sorgarsögu en núna get ég ekki orða bundist.

Ég þekki borgarstjóra ekki hót persónulega enda kemur það málinu ekkert við. Ég er ekki heyrnarlaus og blindur á framkomu þessa manns og er það því dagljóst að hæfileikasnauðari borgarstjóra hefur Reykjavík aldrei þurft að þola. Ég taldi að ekki væri hægt að sökkva dýpra þegar Steinunni Valdísi var þröngvað upp á borgina en nú hefur sannast að enn er hægt að komast lægra og hægt er að finna fólk með jafnvel rýrari hæfileika en sú kona hafði.

Ekki nenni ég að taka þátt í því pexi sem í gangi er vegna kastljóss gærkvöldsins því erfitt er að meta hvor stóð sig verr, Ólafur F eða Helgi Seljan. Hitt er víst að báðir komu illa frá þeirri viðureign.

Það sem mig langar er að grátbiðja borgarstjórnarflokk Sjálfstæðisflokksins  að finna ástæða, einhverja ástæðu, til að slíta núverandi samstarfi við Ólaf F. Magnússon. Þetta samstarf er til skammar. Þið sitjið í súpunni og munið þurfa að dragnast með þennan draug út kjörtímabilið og að því loknu tapa næstu borgarstjórnarkosningum á svo stórkostlegan máta að það verður erfitt að ná landi í langan tíma eftir það. Það má einu gilda hversu góð ykkar verk verða það sem eftir lifir þessu kjörtímabili. Þið sitjið uppi með þvergirðingslegasta sauðhaus sem reikað hefur um völl stjórnmálanna frá upphafi tíma (nema kannski er vera kynni að Hjörleifur sé verri) og það hvort sem gripurinn er borgarstjóri eða ekki. Hann gaf það út nýverið að hann "gæfi engan afslátt" á skoðunum sínum hvort sem hann væri í stjórn eða stjórnar andstöðu. Þetta hlýtur að gefa ykkur vísbendingar um að hann verði ykkur ekki bara erfiður ljár í þúfu á meðan hann lítilsvirðir borgarstjóraembættið, hann verður ykkur dragbítur út kjörtímabilið og kemur í veg fyrir að þið komist nálægt endurkjöri ef þið þraukið til enda.

Ef þið finnið ykkur leið til að slíta þessu samstarfi og gangið út með einhverskonar reisn núna og sitjið á hliðarlínunni það sem eftir lifir kjörtímabili án þátttöku í borgastjórn er eilítill möguleiki að misgjörðir þess meirihluta sem við tekur verði nægar til að dapurt minni kjósenda breiði yfir það vandræða ástand sem komið er á í borginni. Ykkar núverandi þátttaka í dapurri atburðarás í borgarstjórnarmálum hefur klárlega áhrif á landsvísu þó að framganga núverandi vinstri stjórnar vegi þar reyndar þungt líka.

Ekki draga um of að slíta þessu samstarfi. Vaknið og víkið!