Stóra Bleika og Bláa málið reynist ekki hámark vandræðagangsins

Femínisti er ég ekki, eða það vona ég. Ég vil ekki með nokkru móti láta bendla mig við þann hóp fólks og ekki heldur hvalfriðunarsinna, náttúruverndarsinna, eða aðra sambærilega hópa fólks sem böðlast áfram á þeim forsendum (hver á sinn máta) að Illt umtal sé betra en ekki neitt. Líkast til liggur einhver falleg hugsun að baki baráttu allra þessara hópa sem gerir þeim kleyft að réttlæta fyrir sér og öðrum hvaða aðferðum er beitt. Ég vil veg hvala sem mestan, náttúrunni unni ég og jafnrétti finnst mér svo eðlilegur hlutur að það ætti ekki að þurfa að ræða það. Mugabe reyndi nýverið að banna verðbólgu með lögum. Paul Watson tók tappann úr hvalbát. Lopaliðið á fjöllum hlekkjar sig við vinnuvélar. Ef þetta væru ekki svona alvarlegir hlutir væri nóg að brosa út í annað og vorkenna þeim öllum fyrir barnaskapinn og einfeldnina. Vandinn og alvarleikinn felast í að þetta fólk kemur óorði á þau málefni sem verið er að berjast fyrir. Ég fæ óbragð í munninn og fer hjá mér við tilhugsunina um hvert ógagn hlýst af asnaskapnum. Þó ég geti verið sammála málefnunum hverju fyrir sig get ég afar illa komið nálægt fólkinu í eldlínunni sem eru þó án efa besta fólk.Það fer um mig ónotatilfinning þegar ég sé fréttir sem eru jafn dapurlegar og þessi af kæru "Öryggisráðs Feministafélagsins." Ég nenni ekki að ræða um hve illa fréttin er skrifuð og frágengin og læt nægja að segja mína skoðun á þessari yfirgengilega kjánalegu kæru þeirra feminista. Fáránleikinn er svo torskilinn að ég fer hjá mér þegar málefnið kemur upp. Burtséð frá réttmæti þess að banna klám, ef það er nú hægt, er það að fara í mál við Valitor – Visa Ísland bara vandræðalegt. Af hverju ekki að beita sama ráði á Símann eða Vodafone fyrir þeirra aðild að málinu. Þessi fyrirtæki eru jafnvel flæktari í málið en V-V. Þau aðstoða Valitor við glæpinn með því að hjálpa þeim sem skipta við þessa erlendu klámvefi að koma sínum viðskiptum í kring. Þessi fyrirtæki gera klámneytendum kleift að stunda sína iðju með þvi að veita þeim aðgang. Þau BIRTA ósómann. Án þeirra væri þessi glæpur ekki mögulegur. Ég er almennt ekki þeirrar skoðunar að svo megi böl bæta að benda á annað verra en mér finnst vel við hæfi að segja skoðun mína þegar svona bjánaskapur fer af stað. Þetta er málstað feminista ekki til framdráttar frekar en það þegar óvitar hlekkja sig hátt uppi í vinnuvélum og neita svo að nokkur hætta hafi verið á ferðum (lögreglan hafði val um hvort fólkið var sótt upp í kranann eða ekki) hjálpar málstað náttúruverndar.Ég bið þess lengstra orða að fólk láti af þessum tiltækjum svo það verði ekki enn verra að samsama sig félagsskap feminista.

Femínistafélagið kærir Vísa-klám

Athugasemdir

[Kristján Thors (IP-tala skráð) 13.12.2007 kl. 16:56]

Það væri gaman að fá að heyra hvað dómarinn segir við þessum ásökunum öryggisráðsins...hehe maður hlær doldið við þessa tilhugsun.  Í hvert skipti sem einhver segir eitthvað gegn feministum þá er maður sjálfkrafa orðinn karlremba og á móti jafnrétti. Sjálfur hef ég engan áhuga á að sjá konur með minni laun en ég sjálfur, en aldrei í lífi mínu færi ég að kenna sjálfan mig við feminista hreyfinguna. Finnst það einnig mjög góð spurning afhverju ekki er bara hægt að vera jafnrétti sinni, afhverju feministar?

En fyrst þau eru byrjuð á þessu afhverju ekki fara alla leiðina? Fara í mál við þau fyrirtæki sem gera fólki kleift að komast á netið, fara í mál þau fyrirtækji sem framleiða forrit til að skoða video og myndir á netinu, fara í mál við þá sem fundu upp netið og svo má ekki gleyma íslensku þjóðinni sem notar netið og skoðar klám á netinu. Maður spyr sig

[Daníel Tryggvi (IP-tala skráð) 14.12.2007 kl. 20:32]

Það er upp að vissu marki rangt að kenna internetfyrirtækin við þetta mál, þar sem þau græða ekki á kláminu, sem lögin segja til um að sé bannað. Þó getur sú staða vissulega komið upp að aðili fái sér internettengingu í þeim eina tilgangi að kaupa sér klám á netinu eða skoða, þar með græða internetfyrirtækin á klámiðnaðinum. Hins vegar þykir mér þessi staða frekar langsótt og rökin léleg því ef aðilinn notarar internetið í eitthvað annað en klámskoðun eru fyrirtækin saklaus. Það má nú samt alveg skoða þessi lög aftur, staðan eins og hún er núna er gjörsamleag fáránleg.