Það er tilgangslaust að skila auðu

Ástráður Haraldsson formaður landskjörstjórnar sagði nýverið að til stæði að halda til haga fjölda auðra atkvæða og halda þeim aðskildum frá ógildum. Þetta er vel. Nú er hægt að bæta einni víddinni við atkvæðagreiningu og 10 mínútum við kosningasjónvarpið. Þetta gerir fátt annað.

Sem ég stend í kjörklefanum staðráðinn í að skila auðu til að mótmæla handvömm í hagstjórn undanfarinna ára hugsa ég til þess með ánægju að nú muni þeir Geir og Björgvin sko skammast sín. Ég sest fyrir framan sjónvarpið um kvöldið til að fylgjast með atkvæðatalningu og bíð eftir að heyra í þeim félögunum á einhverjum tímapunkti um kvöldið lýsa því yfir að þeim þyki þetta leitt og að þeir vildu taka allt aftur og bæta sitt ráð. O nei. Það gerist ekki. Þáttastjórnendur gerast duglegir við að rýna í fjölda auðra atkvæða og komast að ýmsum niðurstöðum. 

Ein þeirra er að fjöldi auðra atkvæða sé klárlega afrakstur Evrópustefnu stjórnvalda síðustu ár.

Önnur þeirra er að auðu atkvæðin séu líkast til skilaboð til Sjálfstæðisflokksins um að stuðningsmenn hans geti ekki hugsað sér að kjósa sinn gamla flokk en, á sama tíma, geti heldur ekki hugsað sér að styðja neinn annan.

Margar fleiri skýringar eru líklegar á fjölda auðra atkvæða hvort sem þeim mun fjölga eða fækka. Það sem ég meina er að kjósandi skilar auðu í von, veikri von, um að einhver muni túlka sitt auða atkvæði á réttan hátt mun verða fyrir vonbrigðum. Það að skila auðu er sambærilegt við að afsala sér kosningarétti sínum tímabundið til þess að gefa einhverja yfirlýsingu sem verulegar líkur eru á að verði misskilin.

Ef þú vilt senda skilaboð skaltu mæta á kjörstað og merkja við einhvern þeirra stjórnmálaflokka sem eru í framboði. Allt annað er vanmáttugt.

Ef þú vilt refsa Sjálfstæðisflokknum skaltu kjósa einhvern hinna. Það eru skýr skilaboð. Ef þú vilt ekki búa við vinstri áþján næstu 1-2 árin skaltu kjósa Sjálfstæðisflokkinn. 

Umfram allt, ekki skila auðu. Það er gagnslaust og skilar niðurstöðu sem mun ekki geðjast þér. 

Margir ætla að skila auðu

Athugasemdir

[Guðbjörg Gísladóttir (IP-tala skráð) 22.4.2009 kl. 09:11]

ÞAð að skila auðu er það versta sem við getum gert.  Nema helst að við viljum mótmæla þessum kostningum, en þá er bara betra að kjósa sama og síðast.

Ég persónulega ætla ekki að merkja við D þó að ég sé flokksbundin.  Ég er ekki búin að ákveða hvað ég kýs, en ég mun nýta mér yfirstrikanir. Það er eina leiðin að mínu viti.

Guðbjörg

[Ása (IP-tala skráð) 22.4.2009 kl. 09:25]

Persónulega finnst mér það betri kostur að skila auðu heldur en að kjósa það sem í boði er.

Það er ákveðin yfirlýsing í auðu atkvæði og ég nýti mér þá kosningarétt minn til þess.

Ása

[Bjorn Jonasson (IP-tala skráð) 22.4.2009 kl. 09:32]

Hvorn hefðir þú kosið, Stalín eða Hitler?  Hefðirðu skilað auðu, eða ekki mætt á kjörstað.  Það dapurlega hve valkostirnir eru aumir.

Hefnikosning er ekki valkostur fyrir marga.  Á reiður hægri sinnaður einstaklingur að kjósa Vinstri Græna, sem hann því sem næst fyrirlítur, bara af því að hann er svo reiður.  Ég hef heyrt þessi bull rök á fleiri stöðum, þetta virkar sem röksemdafærsla fyrir fólk sem heldur framhjá, vegna þess að það er svo reitt við makann, í stað þess að einfaldlega láta það ekki eftir sér að hefna sín og skilja við hann eða leysa málin þegar mönnum er runnin reiðin. 

Skilaboðin til Sjálfstæðisflokksins eru skýrari ef hann veit að auðir seðlar voru að 90% Sjálfstæðismenn eða Framsóknarmenn sem hann hefði með auðmýkt, raunverulegum hreinsunum, lýðræðisumbótum í landinu og innan flokksins getað fengið til sín, frekar en að Vinstri Grænir fái frábæra kosningu út á málefnalega kosninga baráttu.  Hvor skilaboðin myndir þú skilja betur, það að þitt fólk hefði setið hjá og þú tapað þess vegna eða að þau hefðu skipt um lið og kæmu jafnvel ekki til baka. 

Kosningabaráttan snýst um hina óákveðnu og óánægðu, hinir eru gefin stærð.  Því skal ég lofa að hef farið er eftir þessari kennisetningu, að auð séu ónýt atkvæði, þá muni hinir óánægðu Sjálfstæðismenn sem taka mark á þér frekar kjósa sinn flokk en að skipta um lið.  Mitt mat er að þú sért í illa dulinni atkvæðasmölun fyrir sjálfstæðisflokkinn.

[Ólinn (IP-tala skráð) 22.4.2009 kl. 10:30]

Ok... á maður bara að kjósa eitthvað ef maður er ósammála öllum???

Það halda allir að þeirra flokkur sé svo frábær að ef maður er óákveðinn eða ósammála öllum þá sé það bara gefið mál að kjósa þá...

KJAFTÆÐI og HROKI....

[Ólafur Tryggvason Þorsteinsson, 22.4.2009 kl. 12:21]

Grétar, hvað ert þú að meina með síðustu færslu þinni?

[Ólafur Tryggvason Þorsteinsson, 22.4.2009 kl. 15:33]

Grétar. Mér gekk það síst af öllu til að kasta rýrð á stúlkuna eða hennar ræðu. Það var að sjálfsögðu stórkostlegt af henni að hafa kjark til að standa þarna á sviði og tala til fólksins. Gott hjá henni og megi henni vel farnast í hvívetna. Ég held að frekari umfjöllun um hennar þátt sé best hætt í bili.

[Hilmar Gunnlaugsson, 23.4.2009 kl. 19:10]

Að skila auða er ólýðræðislegt og fólkið sem það gerir misnotar sér borgaraleg réttindi sín til að velja stjórnendur landsins. Því óska ég þess að sem fæst atkvæði verði auð næstkomandi Laugardag.

[Bjorn Jonasson (IP-tala skráð) 24.4.2009 kl. 13:20]

Að kjósa ekki er kannski ólýðræðilegt, að skila auðu er að virða lýðræðið og neita að velja á milli vondra valkosta, skýr skilaboð um að þörf sé á betri valkosti. 

Hilmar rekur ís sjálfsala sem býður upp á 5 mismunandi gerðir af ávaxta ís sem mörgum viðskiptavinum hans þykir vondur, en þeir velji þó alltaf þann sem þeim persónulega þykir skástur.  Hvaða líkur er á að Hilmar fari að selja súkkulaði ís sem mörgum finnst góður, ekki miklar.  Hann kemst að því að stór hluti viðskiptavinanna sem kom að sjálfsalanum með það að markimið að kaupa ís en snýr frá.  Eru ekki auknar líkur á að hann endurskoði úrvalið og bæti nýrri bragðtegund við.